Geguritan

lintang panjer sore

mangsane peplayon anguja wetu
ngarah layangan tumekan surup
abyor cahyane mripat andulu
ing bang kulon lir kebak urup

jumangkah laku jaka kumala kala
nemahi siring tyas kang sepisanan
kelap-kelap katon tempuking netra
ing panjer sore nyuntak tab-taban

mbacut lumaku mipil angangen
ngranggeh sedyaning gegebengan
ketunjang surang laku tumemen
ing lintang kana ngudhar sambatan

endah candhikala linambaran asih
sakbrayat den ajak nguntab esemmu
ngiringke surya angslup sumulih
‘ra kateg nyawang ing ngawiyat biru

wus dhawuk miki rambut neng sirah
mbaka siji anak aninggal sesowangan
njenggereng dhewekan sepi sumrambah
anget rinasa surup sunar kang kinematan

poma mbesuk sirna sumewa bali
angangen cahyamu ngerobi maesan
sakcuil mangsa titah antuk ngiseni
tanpa sawiji lebu bakal anyisa pisan

wiwit mbiyen nganti mbesuk tumuli
panjer sore yekti tansah anyunaran

kapetik:  Grup GURIT SASTRA JAWA GAGRAG ANYAR
             lemahdhuwur, dha 26/08/12