KUNARPANING ASMARA

Dak regem wewayangan iki
Rinengkuh bakuh rinangkul ing dhadha
Tapak tilasing katresnan
Nadyan wis koncatan setya
Kasempyuh umbaling tindak culika
Ninggal tatu nedhas jroning driya
Nanging......
Larikan crita asmara jaman semana....
Maksih kober kababar ing pangangen-angen
............
Nalika....
Kocehing kukila angrumpaka sekar asmara
Binarung swaraning bremana ngisep sarining kembang
Sumilire angin sore amibuhi
Endahing swasana nalika iku
Aku lan sliramu
Sesendhen sak ngisore wit mandira gung
Slagamu tansah lelendotan
Nggegem driji sajak emoh owal sajuga
Nyugata tembung manis manuhara
Prasetya tresna lahir batin
Setya tuhu tumeking pati

Hem......
Esemu kang sepet madu
Tembungmu kang aris ulatmu manis
Abang jambon pipimu nalika dak aras
Lenguhmu nalika anggamu dak rangkul
Banjur dak cecep lambemu kang nyigar jambe
Umbal ambegan sinambi nggeget lathi
Sawetara wektu andum asmara
Banjur turon pinangku wentismu kang kuning
Binantalan payudara nyengkir gadhing
Woh.....
Iku wektu samana...
Datan karasa jumangkahing mangsa
Wus ngancik telung windu
Akeh crita cinathet
Suka dukita linakonan
Bareng lakuning hurip
Tumibaning mangsakala
Katresnanmu biyen koncatan rasa
Lir madu ilang manise
Upama gangsa kelangan larase
Temah sepa sepi ing driya
Ilang tembung pangalembana
Kang gawe suka bungah
Satindak tanduk mung gawe sujana
Saklimah tembung mung gawe sungkawa
Dumadakan
Mendhung tumiyung angendanu
Peteng ndhedhet lelimengan
Binarung swaraning thathit ambrebegi
Warta sumebar ujare mbok bakul sinambiwara
Sliramu tega tumindak culika
Andum asmara marang priya liya
Marga kabujung tembung manis
Kalawan peparing jimat sinandhi
Awujud cupu manik astra gina
Peparingsih bathara surya
Banjur sliramu tega nyidrani tresna
Pasrah jiwa raga temah labuh andum asmara
Duh..... Windradi..windradi
Sliramu ngundhuh wohing pakarti
Mandi ucapku sliramu wujud reca
Anak-anakmu kecipratan dosamu
Gowarsa Gowarsi lan Anjani
Awujud manungsa pepaes rewanda
Merga kabeh melik barang sing dudu mesthine
Luput anggonku muja brata
Panekungku salah kedaden
Lena kaprayitnan ngayomi kulawarga
Aku luput, sliramu salah, anakmu yo kleru
Windradi...winradi